Langt heimefrå Det raslar i bregner og løv medan den lille fyren beveger seg gjennom skogen på jakt etter interessante plantar. Høgt over han kneisar trekronene som svaiar majestetisk i den svake vinden. Overalt omkring han går livet sin vante gang for nattevåkarane i naturen. Plutselig stoppar store bilar med brølande motorar opp i skogkanten. Det skarpe lyset frå lyktene bryter tussmørket, og iført tunge støvlar stormar mennene inn mellom trea på sin jakt. For seint blir den lille fyren klar over at venene hans ropar han tilbake. Dei slettar spora sine og forsvinn, og etterlet han heilt åleine i ei verd han ikkje høyrer til. Og dei bråkete menneska har fått ferten av han. Samtidig, i ein av forstadene, er Elliott (Henry Thomas) ute for å hente ein pizza som hans eldre bror og venene hans har bestilt. Han høyrer at det raslar i skuret, og kiker inn for å sjå om det er hunden hans som har gøymt seg. Men det er ikke hunden, og forskrekka spring han tilbake til huset. Mora Mary (Dee Wallace Stone) og dei store gutane styrtar ut for å undersøke saka, men finn ingenting og konkluderer med at ein prærieulv har vore på ferde. Men Elliott veit ikkje heilt. Han er sikker på at det var noko anna. Neste dag legg han eit spor av sukkertøy frå skogen og ned til huset for å lokke det mystiske vesenet til seg. Den påfølgande natta tilbringer han inntylla i eit teppe i liggestolen ute i hagen, og plutseleg vaknar han frå sin urolege søvn: Foran han står eit vesen, ulikt alt anna han tidlegare har sett på jorda: Ein extra-terrestrial - E.T.